ஈரமனம்

கூந்தலில்

ஒற்றை ரோஜாவை ரசித்திடும்

நாகரீக மனிதன் நான்

கூந்தலை

கூடை பூக்களில் மறைத்திடும்

கிராமத்து பெண்

என் காதலி

தினமும் வாங்கி வந்தேன்

கூடை நிறைய பூக்கள்

அவளுக்காக இல்லை

எழுபது வயதிலும்

சுட்டெரிக்கும் வெயிலில்

அயராது பூ கட்டி விற்கும்

ஒரு பெண்மணிக்காக

நாகரீக போர்வைக்குள்

இருக்கத்தான் செய்கிறது

ஒரு கிராமத்தானின் இரக்கம் ….

ஆசை விதைகள்

நேற்று என்ற நிழலில்

கருவாக தோன்றி

இன்று என்ற நிஜத்தில்

உருவமாக மாறி

அறுவடைக்கு காத்திருக்கின்றன

ஆசை விதைகள்

நாளை என்ற கனவில்...

ஓர் அகதியின் (அகத்தின்) குரல்

தினமும் கனவுகளில் உன் வருகை
நிஜத்தில் எப்பொழுது ?

கற்பனைகளில் உன்னுடன் உரையாடல்
நிஜத்தில் எப்பொழுது ?

உறவுகளில் மென்மை
துணைவனின் தோழமை
மழலையின் கால் தடம்
இன்னும் பறந்து விரிகிறது
நிழல் உலகில்
என் எண்ணங்களும் ஏக்கங்களும்

நிஜ உலகிற்கு
அழைத்து வருகிறது
ரணமாகும் பார்வைகளும் பேச்சுகளும்

நாளை நிச்சயம்
கனவு மெய் ஆகும்
என்ற எதிர்பார்ப்பில் உறங்கிடும் மனம்
ஏனோ விடியும் பொழுது
இன்றும் இல்லையா?
என்றுமே இல்லையா?
என்று விடை தேடி அலை பாய்கின்றது

என் உறவுகள் மலர்வது ஏனோ
வெறும் கனவுகளில் மட்டும் தானோ

உன்னை பிடிக்கும்

மழையில் நனைய பிடிக்கும்
இசையில் மிதக்க பிடிக்கும்
புத்தகத்தில் மூழ்க பிடிக்கும்
நண்பர்களுடன் அரட்டை பிடிக்கும்
வித விதமாக சமைத்திட பிடிக்கும்
மொட்டை மாடியும் பௌர்ணமி நிலவும் பிடிக்கும்
கடற்கரை மணலில் கை கோர்த்த நடை பிடிக்கும்
ரயிலில் ஜன்னல் ஓர பயணம் பிடிக்கும்
இயற்கையை ரசிக்க பிடிக்கும்

குழந்தையாக
குமரியாக
மாறி மாறி வியந்து நிற்கும்
என்னை
என் ரசனைகளை
மெய்மறந்து ரசிக்கும்
உன்னை
மிக பிடிக்கும்

இப்படி
உன்னை பற்றிய கனவுகளில்
திளைத்து இருக்க பிடிக்கும் …….

பிழை

கல்யாண அழைப்பிதழல்
மனதில் தங்கிய பெயர்
அச்சில் ஏறுவதில்லை
அச்சில் ஏறிய பெயர்
மனதில் தங்குவதில்லை
பிழையின்றி அமைய
அச்சுதிருத்தம் வேண்டும்
வார்த்தைகளுக்கு மட்டுமல்ல
வாழ்கைக்கும்தான்

இயற்கையுடன் தோழமை

சிறகடித்த காலங்களில்
ரசிக்க மறந்த இயற்கை
சிறகொடிந்த தருணத்தில்
நண்பர்கள் ஆகின

தடம் பதித்து சென்ற உறவுகளுக்குகாக
வழி மேல் விழி வைத்து
நாம் காத்திருக்க
நமக்காக காத்திருக்கம் தோழி
நிலா

நினைவு அலைகளில்
மூழ்கும் நம்மை பார்த்து
கண்சிமிட்டி ரசிக்கும் நட்சத்திரங்கள்

பிரிவிலும் துரோகத்திலும்
வறண்டு கிடக்கும் இதயத்தை
சிறிது நனைத்து செல்லும்
மழை துளிகள்

ஆதரவாக அணைத்து கொள்ளும்
தென்றலின் நேச கரங்கள்

விடியலை நோக்கி நீளும்
இந்த தனிமை பயணமும்
ஒரு சுகம் தான்
இவர்கள் உள்ள வரை …………..

காற்றாடி

ஏழைகளின் கனவுகளுக்கு
மீண்டும் ஒரு தடை
நகர எல்லைக்குள்
இலவசமாக வானில் பறந்திட
அனுமதி இல்லை
காகிதத்தில் கட்டி பறக்கவிட்ட
அவர்களின் இதயங்களுக்கு